هل اللي اتكسر بيتصلح ؟؟! كلنا في وقت ما .. مرينا بفكرة ان حاجة غالية علينا حصل فيها خدش او كسر واغلبنا اتعصب واتضايق من اللي حصل بس لو فكرنا لوهلة كدا ... ان دا خلاص حصل ومافيش مفر منه كانت هتظهر لينا حلول ابداعية مختلفة غير رمي اللي اتكسر في الزبالة والحقيقة دا مش بيحصل بس في الأشياء بل بيحصل فينا احنا كمان كنفوس بشرية فهل اللي اتكسر بيتصلح ؟!! في الحقيقة لأ ... ولكن يُمكن إعادة تشكيله ليصبح أكثر جمالًا ورونقًا مما كان عليه احيانا الشرخ اللي بيحصل بيبقي تنبيه لضرورة التغيير بيبقي بمثابة إنذار يصحينا من الغفلة اللي احنا فيها جايز النسخة اللي اتكسرت مننا مش عارفة تجاري متغيرات ومعطيات حياتنا اليومية جايز النسخة اللي اتكسرت كانت مخليانا واقفين مكاننا من غير حركة ف كان ضروري يحصل الخدش أو الكسر دا عارفين لما مجموعة من الناس تطلع تحارب وبيرجعوا منتصرين في الآخر ايه اللي يثبت انتصارهم دا ويخلد ذكراه غير التاريخ ؟ الإجابة ببساطة هتكون " الندبات " ... الندبات أكبر علامة علي انتصار الشخص دا داخل الحرب هي دليل ان الشخص دا كان موجود .. عاش حياة فريدة ف أيوا مافيش حرب من غير ندبات سواء كانت حرب جسدية ، نفسية ، روحية او حتي عقلية وهنا تستوقفني المقولة العظيمة ل ( ديفيد غاغينز ) : " الفكرة ومافيها هي أني دخلت حرب مع عقلي واللي بتشوفه ظاهر امامك الآن هي آثار تلك الحرب " ف تعالوا نتقبل فكرة الألم والمعاناة والكسر لأنهم جزء من الحياة دا بيحصل عشان يسيبلنا رسالة تنبهنا لشيء معين الشاطر بقي هو اللي يبقي عنده شجاعة فتح الرسالة دي وفهم مغزاها ومضمونها ويتصرف علي أساسها عشان يقوم بدوره كمساهم في رحلة إعادة تشكيله ويخرج منها كمنتصر بخبرات جديدة محتاجين بس نسمح لربنا بالتدخل عشان يعرف يُعيد تشكيلنا لانه عكس المتعارف عليه عمره ما كان الوقت كفيل للشفاء الكامل او تغيير المعطيات عشان يوصل بينا لنتايج مختلفة لكن الرتوش اللي بتفضل موجودة بتبقي بمثابة تذكير عن اللمسات الإلهية اللي تدخلت للإنقاذ وقت ما خارت قوانا ♥️ #Erin Amir