اكتر من خمسة شهور عارف ومتأكد إن كاوتش العربية الجديد دخل فيه مسمار.

كل ما يقل الهوا أدخل لبتاع كوتش أزوده وأمشي.. الموضوع حسيته بيحصل كتير عملت فيها ناصح.. مش أروح أصلحه..لا اشتريت منفاخ..
الموضوع اتطور.. بقيت لازم أخرج الصبح بدرى عشر دقايق عشان أنفخ الكاوتش.. وبعد الشغل أنفخه في عشر دقائق كمان..

ولما لقيت إن المنفاخ بياخد وقت طويل.. وصلت للحل.. مش أروح أصلح العجلة !!!.. برضه لأ..

اشتريت منفاخ بينفخ أسرع.. بكده.. بقيت بنفخه في خمس دقايق بدل عشرة.. وده طبعا لأن الوقت كالسيف..😊
بعد خمسة شهور من المشكلة دى.. وصلت لمرحلة إنه بنفخه حوالي أربع مرات في اليوم.. بس بالمنفاخ السريع.. فحسيت إن الدنيا ماشية.. وإن دى تيجى إيه في معاناة ناس تانية كتير..

المحصلة بعد خمسة شهور.. تكلفة نفخ الكاوتش ما بين نفخه عند محمد الصعيدى وتمن المنفاخين.. لا تقل عن ٢٠٠٠ جنيه.

الوقت اللي ضيعته في نفخ الكاوتش علي مدى خمسة شهور كانت 3759 دقيقة تقريبا.. يعنى حوالي يومين ونص..

ولانى بسوق كتير.. عملت بالعربية في المدة دى حوالي 35 ألف كيلو متر.. وهى بالحالة دى !!

المهم.. لما قررت إنى أصلح الكاوتش.. اتكلف ٧٠ جنيهالحام المانى .. واتصلح في ربع ساعة!
الموضوع طبعا عبارة عن كوميديا سوداء.. لأنه غير خسارة الوقت والفلوس.. كان ممكن يكون فيها خسارة أرواح!!

-الخلاصة أننا بنفس المنطق..
في وسط دوامة حياتنا بنتعامل وبنحاول نتكيف مع أوضاع وظروف وخطايا غلط كتير في حياتنا لشهور وأحيانا سنين.. وبدل ما ننهى الأمور بشكل جذرى.. أو نبعد بشكل قطعى.. بنحاول نتعايش رغم الخسارة ورغم معرفتنا أن اللي إحنا فيه ده غلط..
قد نُخدع بأن الخسارة بسيطة وقد تكون منعدمة... لكن الواقع بيقول غير كده.. أن الخسارات البسيطة المُجمعة.. محصلتها خسارة كبيرة وقد تكون كارثة!!