🌸 وها أنا يا الله أقف علي حافة الهاوية من جديد قد نازعتني نفسي بعد طول انتظار وصبر ... سهر وليالي كاحلة سوداء بعد ألم عاد الرجاء يظهر من جديد ليذكرني بعظم رأفتك ومحبتك لي وانك تعرف ضعف جبلتي وتعلم يأسي وقلة حيلتي تعلم كم كنت أرجو الوصول لمرساة وطوق نجاة ولكنك أردت لي الغرق لتعود وتنقذني بعظم يديك ، تنتشلني قبل فوات الأوان كم من مرة ضعفت عندما شارفت علي الإنتهاء ... كنت أغفو عن بركة عملك فيا ... لتعود وتدنو إلي وتذكرني بمدي قوتي وصلابتي وأنا بجانبك كم من مرة أردت شيء وأنت لم ترده ... لتعلمني أن مقاصد الله أعظم لي من ترتيباتي ومحدودية أفكاري وخططي البشرية كم من مرة تنهدت نفسي إليك وترجتك لتسمح لها بالوصول للميناء ... وانت تحتضني لتهمس لي بإشاراتك الحنونة الوديعة انه " ليس المنتهي بعد " لأعيش حياة التسليم والثقة بوعودك التي ليس لها مثيل مهما ضاقت الخيارات ، وانعدمت المحاولات ، وتوالت الخيبات قد اتضح أن الخيبات هي طرف خيط من عظيم الأنجازات بعدها ، وأن الخيارات الضيقة دلالة علي تفردنا لها وأنها خلقت خصيصًا لأجلنا نحن فقط اجعلني دائمة الثقة في ترتيباتك ... عد ورتب فصول حياتي ليأتي الربيع بعد زوبعة الخريف ، وليأتي النسيم بعد عصف الشتاء بعد ليالي كاحلة من الإستياء ، لتأتي الرحمة بعد شدة القسوة والجفاء عد واشبع ارواحنا بالهدوء والرضا لنحيا بسلام مستمتعين بخيراتك وبحياتنا التي شكلت بإختياراتك ♥️ #Erin Amir

🌸 خلاص هنودع 2023 ونستقبل 2024 وبلحظة انتهاء السنة مش هتفتكر ازاي صمدت لآخرها ... مش هتفتكر ازاي خرجت منها بكل الإنجازات و اللحظات الحلوة دي ... او الدروس اللي اتعلمتها ... مش هتبقي مدرك هي خلصت ولا لأ ... بس هتكون متأكد من حاجة واحدة بس وهي انك مش هترجع نفس الشخص اللي كان قبل كدا ف ابدأ عيش سنتك الجديدة يوم بيوم وافرح بأصغر تفاصيلها بوجود أهلك وصحابك ... متخافش من عيش التجربة ... تجربة شعور جديد .. تفكير جديد ... أماكن وأشخاص جديدة ... خليك ممتن للرحلة اللي خضدتها السنة اللي فاتت وازاي استمتعت بيها واتعلمت منها اتأمل المواقف الصعبة اللي مريت بيها وقدرت تتخطاها وتخرج منها بإستفادة ... خليك ممتن للحظات المحبطة لأنها هي السبب في انك تعرف ازاي تستمتع باللحظات السعيدة وتقدرها ولو حسيت انك فقدت كل حاجة في السنة اللي فاتت ، افتكر دايمًا ان الأشجار بتفقد أوراقها كل سنة وبتفضل شامخة مستنية أيام أفضل جاية يارب تكون 2024 بداية جديدة مختلفة واستثنائية للكل ... سنة تجديد وتغيير ... سنة تقبل واكتفاء ... سنة طمأنينة وسلام ... سنعة تعويضات مفرحة للكل بعيدًا عن أي انطفاء أو خذلان ... بعيدًا عن أي سلبيات أو مضايقات ... سنة ممتعة ومثمرة ... سنة سلام في حماية ربنا ودايمًا قريبين من تعاليمه ووصاياه ♥️ #Erin Amir

🌸 مع كل تسبحة وتمجيد للعدرا ... بفتكر كم المعاناة اللي اختبرتها وحجم المسئولية اللي اتحطت فيها بدون استعداد منها ... ومع ذلك هي تقبلت كل حاجة بتسليم عظيم فاق كل التوقعات بفتكر كم أصابع الإتهام اللي اتوجهتلها ... ومدي كونها مذنبة في عيون اللي حواليها ... لكن ع الجانب الآخر هي عايشة في سلام وتقبل للواقع اللي اتحطت فيه مرددة دائمًا : " أنا أمة الرب ، ليكن لي كقولك " بتخيل كم نظرات العار اللي شافتها وهي بتصبر نفسها وتقول : " هوذا منذ الآن جميع الأجيال تطوبني " وفعلًا حصل اللي قالته العدرا بالحرف والله قرر يكافئها اعظم من اي توقعات بشرية ممكن نتخيلها العدرا دايما بيتم تطويبها في كل الأديان ... وكل انسان عارف قصتها موقن تمامًا انها عذراء وبتول وإنها استثنائية وموقن تمامًا ان اللي حصلها كانت معجزة إلهية وان الرب يسوع فعلًا دخل وخرج والباب مغلق ف لكل انسان بيمر بتجربة صعبة عليه ومش قادر يتقبل الواقع اللي اتحط فيه ، او اتعرض لظلم وهو مالوش يد فيه ومش قادر يثبت العكس ... اتمثل بالعدرا علي قد ما تقدر خليك مدرك تماما ان مهما اتعرضنا لظلم وضيق فهو لتمجيد اسم الله وانه " ليس المنتهي بعد " العدرا اختبرت أشياء مريرة فهي بتنظر لكل شخص بعين متحننة ، حاسة بكل واحد ومدي صعوبة اللي هو فيه هي قادرة تضمد الجروح الظاهرة والخفية .... قادرة تحاوط كل قلب حزين وتدخل عليه الفرحة والرضا من جديد ... هي شفيعة الأرواح المنكسرة اللي منتظرة الشفاء بفارغ الصبر ... قادرة تهون علي كل واحد بيناديها ♥️ #Erin Amir

🌸 دايمًا بنبقي فاكرين ان أغلب المعوقات اللي بتقابلنا في الحياة بيكون أغلب أسبابها ظروف العالم اللي احنا عايشين فيه ... ولكن بننسي ان اغلب اللي بيحصل حوالينا ماهو إلا إنعكاس للي موجود في أعماقنا لو جواك سلام نفسي وتقبل وطمأنينة هتلاقي أغلب اللي بيحصل حواليك إيجابي وكل اللي بيتجه لك حنون زيك ... أمورك متيسرة وسط ناس بتقدرك وحاجات بتتقن عملها وتبدع فيها ... الحياة بتمنحك فرص تتولد من جديد وتوصلك لآفاق مختلفة تمامًا في جو من الفرح والنجاح والتفرد ... حتي لو قابلتك معضلة مهما كانت كبيرة أو صعبة ، بيبقي فيه شعور جواك بيفكرك دايمًا إنها مؤقتة ويساعدك علي تجاوزها بأفضل الطرق ولكن لما يكون كل اللي حواليك عكس دا ... كل اللي حواليك سلبي ... فيه جو من التشاؤم والملل ... ساعتها اعرف كويس ان فيه أمور كتيرة مدفونة ومتراكمة جواك بدأت تظهر ع السطح ... محتاجاك تتصالح معاها وتسمح لها بالرحيل ... محتاجاك تكون واعي أكتر وتعرف تتصرف ... محتاجاك تتغير وتعرف ان الوضع اللي انت فيه ماهو إلا إنذار بوجود مشكلة محتاجة حل ... محتاجة اتصال مع النفس مش اسقاط المشاكل اللي بتحيطك وأسبابها علي المجتمع وظروفه نضف نفسك و روحك و فكرك وعالج عيوبك واستعد للإستقبال ... العالم مليان رسايل من الإيجابية والمحبة ، السلام والخير والحنان ... بس المشكلة في الاستقبال مش الإرسال ... العالم مستعد يرسلك ولكن لازم يلاقي كاس فاضي يملاه ... محتاج بذرة تكون موجودة عشان يرويها برسايله وتكون النتيجة الإثمار لازم يكون داخلك متأهب للوضع ، متأهب لبكرا مليان بالآمال♥️ #Erin Amir

🌸 أحيان كتير بيحتاج الإنسان انه يفكر نفسه كان ايه وبقي ايه ... كان مين ووصل فين ... الامتنان بيعلم الشخص إزاي يعيش اللحظة ، ازاي يستمتع بالرحلة ... يعلمه انه يشعر ويتأمل ... حتي الحزن يتعلم منه ... كل المواقف الصعبة يقدر يتخطاها لما يفتكر ازاي سبق واتخطي غيرها ، لأن تركيبتنا النفسية محتاجة أمل عشان تقدر تواصل الحياة ... زي السمكة اللي محتاجة مياه عشان تفضل عايشة ... الأمل زي الوقود بيحرك أذهاننا ويتحكم ف افكارنا ... هو زي الزينة اللي بنجمل بيها حياتنا او الألوان اللي بتدي إضافة جميلة ولطيفة ليومنا ... من غير أمل بتتحول لكائن بدون نفس تسعي وتحلم ... لو احنا مش مؤمنين ان فيه أمل وان بكرا هيكون أفضل وبإن حياتنا هتتحسن علي نحو معين ف احنا كدا بنموت من الناحية الروحية ... وف الآخر هتعيش ليه طالما مافيش أمل ... مافيش رجاء ف بكرا وف عمل الله فيه ... ان الأمور هتتحسن وتبقي أفضل من اللي هي عليه دلوقتي ... ولازم تعرف ان الشعور السلبي اللي أحيانًا بيلازمنا بيفتح عنينا ان لسه فيه أفضل جاي ... لسه فيه أمل في الحياة وانك مازلت مهتم بشيء معين وبتعافر عشانه ... ان انت مازلت بتملك الأمل في ايديك ... اتعلم انك تحافظ علي اي حاجة بتخليك تبتسم ، احتفظ بيها سر يقويك وأمل ينور طريقك ويشق آفاق الضلمة ♥️ #Erin Amir

ممكن ماكونش عارفة ايه اللي أصابك او ايه اللي بتمر بيه ... ماعرفش مدي صعوبة ظروفك وسوء حالتك ... ماعرفش عدد خيباتك او شدة صدماتك وتقلب مزاجك ... ماعرفش ايه اللي بتمر بيه من حزن وضيق وأزمات نفسية ... ماعرفش كام حلم سعيت ليه وماتحققش او كام هدف حطيت كل مجهودك وطاقتك فيه وماتسجلش ... ماعرفش قد ايه كافحت وخسرت ولكن فخورة بكل شخص قدر ينهض من كل دا ... قدر يعبر النفق رغم شدة ظلامه ورغم خوفه منه عشان يوصل للنور ... اللي تحلي بشجاعة الاعتراف بالخسارة وماوقفش بل بالعكس استمر في المواجهة ... اللي بيتباهي بندوبه وتجاربه ومابيخجلش منها ... هو دا اللي صعب تحديه ... هو دا الاقوي من الكسر ممكن ينحني ولكن بيرجع تاني أقوي من الأول ... اللي أكبر من الهزيمة لأنهم اختبروا كتير لغاية ماتغلبوا علي صعوباتهم ... هما دول اللي يستحقوا ان شمسهم تشرق من جديد ♥️ #Erin Amir

🌸 فيه آية جميلة بتقول : " ولكن قبل كل شيء لتكن محبتكم بعضكم لبعض شديدة " ( مت 12 : 20 ) هي بمثابة تذكير لينا وكأنها بتقولنا : ركزوا علي تفاصيل اللي بتحبوهم و دوروا علي الحاجة المفقودة فيهم ... ماتسألوش كتير ... وضحولهم انه عادي لو قولتوا انكم ( مش بخير ) ... احتضنوهم بكلامكم ومحبتكم ... خليكم قوة ليهم ... فكروهم دايما بالحاجات العظيمة اللي عملوها واللي بتحبوها فيهم ... لأن الانسان لما يمر بمرحلة حزن او اكتئاب مؤقتة بينسي كل دا وبيبقي محتاج حد يمسك ايده ويفكره بأجمل مافيه عشان يقدر يقف علي رجليه من تاني ويرجع للحياة والحاجات اللي بيحبها من جديد ♥️ بصلي ليا وليكم اننا نكون ملجأ حنين لكل شخص قريب مننا وقت احتياجه ووقت ازماته النفسية ... نكون مثال للمسيح اللي قال عنه الكتاب : " قصبة مرضوضة لا يقصف ، وفتيلة مدخنة لا يطفيء " ( بطرس الاولي 4 : 8 ) #Erin Amir

مين دا بس اللي يقدر يهزك وانت ابن الملك ... انت زي الجبل اللي مابيتهزش مهما دار بيه الزمن ... شجرة مغروسة جذورها في الارض بقوة عمرها مابتتزعزع مهما قابلتها عواصف أو تقلبات ... عمرك جربت تقعد معاه وتصاحبه ... دا الوقت معاه بيمر وانت مستمتع بكل لحظة وعارف انك مش هتطلع من عنده وانت فارغ اليدين ... الانسان مابيتعرفش غير لما تقعد معاه كتير أكتر من مرة ... ولكن الله من أول قعدة معاه تدوق حلاوته وتلمس عمل يديه في كل حاجة مأزماك ... علي الرغم من قساوتنا وبعدنا إلا وهو بيرجع وبيفتقدنا ويشدنا ليه من تاني وينتشلنا من الظلام اللي كنا فيه ... واحنا في بعده مانسواش حاجة والدنيا مالهاش طعم من غيره ... شوف كام مرة تقع وتبعد وهو يقيمك بيمينه ، يضمك لحضنه مهما غلطت في حقه ... حضن المسيح بيسع الكل في أي وقت وفي كل الظروف .. ف اجري عليه بكل مافيك واستمتع بكل لحظة معاه وهو مستعد يقبلك♥️ #Erin Amir

♥️♥️♥️

أحيانًا بتمر علينا أوقات صعبة بنحسها دي آخر طريقنا دا آخرنا احنا هنقف هنا ... مش هنعرف نكمل وبنعاتب ربنا ونقوله " ليه " ؟ ليه اختارتني أنا بالذات في التجربة الصعبة دي ليه غيري أحسن مني ...ليه بتخليني أحس أني ضعيف مع انه بنفسه قال " لأن قوتي في الضعف تكمل " ولكن لما بينتهي الموقف اللي بنمر بيه ، بنكتشف انه كان في صالحنا وكان أفضل تدبير لينا ولحياتنا ونفعنا بعدين ماتقلقوش ... ربنا مابيديش حد حاجة تضره أو بيحمله فوق طاقته دا دايمًا بيبص للأحسن لينا وبعدين مانقدرش نفهم تدابيره لأنها أعظم بكتير من التفكير البشري المهم انك تسلمله أمرك و تتكل عليه هو وبس ♥️ #Erin Amir