" قدم محبة " هل عمرنا فكرنا ليه النهر مستمر بالتدفق والعطاء رغم انه بيتم استنزافه ؟! دايما بيختار انه يعطي من خيره ماء عذب عشان احنا نرتوي بيه وفي المقابل مابياخدش حاجة فهل دا حقيقي فعلاً ؟ ....... انه مابياخدش حاجة في المقابل ؟ في الحقيقة لأ .... النهر يمكن من منظورنا وتفكيرنا اللحظي انه ( يعطي ولا يأخذ ) لكن اللي مانعرفهوش انه لولا عطاؤه لم يكن ليوجد أصلاً لأن التدفق المستمر لمياه النهر بتساعد ان المياه اللي فيه تفضل عذبة ومتجددة لكن لو النهر قرر في يوم انه يخلي المياه دي لنفسه ويبطل تدفق هتتحول المياه دي لكتلة من العفن اللي هتخليه غير صالح في الآخر والحقيقة الفكرة دي لفتتني لآية جميلة جدًا بتقول : " وإن كنت كلما أحبكم أكثر أُحَّب أقل " ( ٢ كو ١٢ : ١٥ ) مين فينا ماحسش الاحساس دا قبل كدا .... انه بيقدم محبة واللي قدامه بيألفها ويعتبرها شيء عادي بدون أي تقدير وكأنها حق مكتسب بس الحقيقة مش اللي قدامك بس اللي بيستفاد بمحبتك ... بل انت اكبر المستفيدين في الآخر جايز انت ربنا عاطيك مصدر كبير وفائض من الحب ، بل جايز انك تكون منبع للحب لكل اللي حواليك وهنا نفتكر المرأة التي اعطت من أعوازها ... فما بالك ان يكون الحب دا من وزناتك اللي لازم تستثمر فيها عشان ربنا يفيض عليك تاني وأكتر بكتير من اللي عندك مش بس من الحب بل من كل خيراته وثمار روحه القدوس افتكر دايما ان " كل ساقي سيسقي بما سقي " فكن انت الشخص اللي يروي الناس محبة ♥️ #Erin Amir